Chhohkha

(He he Keima nata ei chhohkha thatih rona a cha)

Keima nata ei Chhohkhazy Thatih

Keima (A. Zawngia) he Khopai khih liata pihpa nata laihseihpa ei cha. Ei paw he A. Hutha cha ta, atako he 85 a cha. Ei no cha L. Dawzai cha ta, ko 79-na a hmah ngahai. Unawh 2 nata sietano 3 ei hnei. Eima pazina dah, lahpino & vahpa moh nata khihsana suzy he hawhta a cha:

1.A. Pasi – K. Sedo, Khopai

2.A. Buami- HC Chali, Khopai

3. T A Huato – B. Ngohai, Siaha

4.Pasa T. Azyu – S. Ngosei, Siaha

5.A. Nolaw–J. Lekhaw, Khopai

6.A. Zawngia- HC Lalhmangaihpari

Atahma he hati pakha hnei na ta, amoh cha Judith Byhnaso a cha. Atahma he New Siaha liata lahpisawzy khihsa ei ta, kei deikua he achuna vata Shillong liata ei y no a cha. Thaina lata B.A. he NEHU tawhta 2001 ta ei patloh.

Khizaw chano hry liata ei khochaipa nata kyh ei pacha chaipa HC Lalhmangaihpari (Partei) nata 2007 liata a tyh pi ta, a ko heihpa 2008 May 7 khata hrochhoh a kao awpa nata kyh apacha raihrie awpa ta N. Siaha ECM Local Church liata bie eima taih.

Pihno Partei he Puhpa HC Ngunchunga (L) nata Pihno C Lalnghingi (L) sawchano uhtheipa cha ta, vadua kawpa ta a paw ta 2003 khata a vaw pahasai ta, a no chhao 2010 January thla liata a vaw pahasai ha heih. Ano he naro 2 – Hlawnguri nata Lalhualhimi hnei ta; rilahpa 4 – Lallawmsanga, Vanlalenga, Vannunthianghlima nata Lalhmingsanga zy ama cha. Amo chhohkha liata Puhpa Sangpuia nata eima no tah leipa he lahpi-vahpa ahnei mah leipa sai ama.

Pihno Partei he 2000 liata B.A. patloh ta, 2005 liata B.D. a patlo. Ano he Mara chano B.D. apatlo tuachaipazy hry liata tahpa cha ta, atahma he Secretary, ECM KNP (H) ta chakaona rai a hria ngahaipa a cha.

Keima nata Mararah

Mararah liata vaw pih na ta, Marapa ta ei vaw pih. Chavata, ei hrochhoh ei theina zydua “Abeipa nata Mararah chata” hria lyma hra awpa cha ei tao hialia awpa a cha. Mararah nata a zawpi chata ei vaw hria hanazy cha:

MSO liata

MSO tawhna heta Mararah chata ei theina nata pahnonazy vaw hmah pathao na ta. 1998 tawhna khata Joint Headquarters, Aizawl tawhta Executive Committee Member ei cha pathao.
2000-2001 liata Secy i/c Information cha na ta. Thaina Magazine Editorial Board liata Editor ta ei vaw hria hra. 2002-2004 liana khata MSO Gen. Hqrs: Siaha liata viasazy khokheina zawhzi ta Secy i/c Literature maohphaona rai hria na ta. Atahma he Sub-Hqrs: Shillong liata 2009 tawhna khata Advisor ta raopa ei cha.

Abeipa Chakaona liata

Abeipa chakaona he College daihti tawhta a vaw hmah pathao na ta. Evangelical Union liata Active Member ei vaw cha tyh. Secretary nata President maohphaonazy chhao vaw to ha hra na ta. KTP liata cha 2005 khata Khopai KTP Branch liata Asst. Secretary rai buakha ei hria hma. He ko pyly heta Abeipa Awna theipa ta Mission Chakaona la sie awpa khona vaw y ta. June 2005 tawhta September 2008 taihta Tripura Mission Field liata chakaona rai ei vaw hria hra. Tripura Mission liata ei y chhohta hrialahpazy nata hyutuhpenawh khokheina thata to na ta. 2006 tawhta 2008 taihta Principal, Immanuel English School: Sinaikami liata sopa cha na ta. Anodeikua cha, Theological Degree nata Knowledge hnei leipa ta chakaona he a supa ei pahno leipa vata nata Chakaona kawh viapa nata yzie hnei viapa pachapa ta 2008 tawhta Theology achu awpa ta Mission Field puasai na ta. Atahma he John Roberts Theological Seminary, Shillong liata B.D ei tao nga haino a cha. Atlahpa ta ei patlo thei khiacha 2012 liata patlo awpa ei cha.

Shillong liata ei y chhohta Awnanopazy ta na deichhy ei ta, 2010 tawhta Chakaotuhpa (Khichhoh Macha) lapa cha na ta. Atahma he Building Board liata Chairman nata KNP liata Advisor chakaona chhao ei hria ngahai hra.

Mara Literature Lachhah liata

Mara chi nata pho pabohsana chata hmo peimawh chaipa ta ei pahnopa cha Literature he a cha. 1999 khata Puhpa T. Beiradua nata “Mararah Reporter” weekly ta papua tyh pi ta. Aizawl Mara Fellowship pakhyna liata a saipa ta eima rai tyh. Puhpa Duadua ta soh lachhah atoh aw ta, kei ta achhuhpa nata a raihriapa nata araipa lachhah ei buakhei tyh. He heta pahana ei na pie pathao. Rei hapa hawhta MSO Aizawl ta Thaina Magazie papua awpa ta a vaw pathlu nota Editorial Board liata na pahlao hra ei ta. He he ei lapi a vaw thaona a cha. B.A. patlo tawhta keima ta Marareih ta Monthly Magazine papua awpa khona nata achhuahna hnei na ta. Puhpa FC Minela, FC Chhuasa nata Pino K. Helen zy chhao ta “Hraihsua” Monthly Magazine eima tao. Chahrasala, publication nata marketing lachhah rairuna vata tao pazao thei khao ma pi. He tawhna heta Daily Newspaper tao awpa ta achhuah heih na ta, ei uhtapa Pasa T. Azyuh ta Type Writter nata Cyclo-Style na cha leipa heih ta. Ei uhtapa T.A. Huato chhao ta “Zawpi” Daily Newspaper cha 2002 tawhta eima tao pathao heih. Chahrasal he he nietluana hmeiseihpa ta hma theipa a cha leipa vata nata khaw lachhah computer zy eima hnei thei leipa vata 2004 tawhta pachhapa a cha ha heih hra.

He hawhta hmo ei vaw taopa liata hlaotloh kawna rei awpa y vei hra sala, ei hnabeidy hlei vei. A rah zawpi eima hra mah leipa vata hlaotloh mah leipa hawhta ei pacha. Khati daihti liata Mara Literature a chhyh vaw paka aw ta, pawpi hawhta a vaw pawh pyly aw, tahpa hnabeiseihna hnei na ta. Mararah chata ei pachanazy phuah thei awpa nata papua thei awpa ta internet zy vaw y lyma ta. He blog he cha Investment byuh leipa nata soh hryuh leipa ta papua theina a chapa vata, he tawhna heta ei theina, thaina nata pachanazy papua lyma awpa ei chhuah.

He blog a pasohtuhpa zydua hnohta alyna bie cha hla na ta. Nama pasyuna nata khokheinazy khatinorai ta a ngiah kaw na ta, nama deichhyna ei cha haw ei.

Abeipa ta Byhna cha pie mawh sy

By A.Zawngia